Veikindi

Kostir þess að vera einhleypur svona heilt yfir, eru margir. Þegar maður er með flensu eru þeir nákvæmlega engir. Það er þekkt staðreynd að karlmenn verða mun veikari en konur þegar þeir á annað borð veikjast. Við verðum agnarsmáir og þurfum extra mikinn skammt af umhyggju þegar veikindi standa yfir. Við viljum láta fóðra okkur, klappa okkur og láta tala við okkur eins og við séum ungabörn. Nú er ég búinn að liggja í einn sólarhring og ég er svo veikur að mig verkjar í fingurna við það eitt að rita þennan einfalda texta. 'Eg var td orðinn svangur og neyddist til að klæða mig í úlpu og trefil og berjast útí Bjarnabúð að versla. Ekki er matarlystin mikil en ég geri mér þó grein fyrir að ég þarf að nærast til að takast á við þessi gríðarlega erfiðu veikindi sem eru fordæmalaus í mannkynssögunni hvað kvalir varðar. Eitthvað smálegt og misgáfulegt er týnt í körfu og staulast að kassanum. Kristinn í Bjarnabúð sér hversu kvalinn múrarinn hans er. Hann er karlmaður og er nýbúinn að vera lasinn sjálfur og aumkar sig yfir kallinn og stingur hálsbrjóstsykri og fréttablaði í pokann í sárabætur. Hvort að þetta er gert af umhyggju einni saman eða þeirri bláköldu staðreynd að ég var búinn að lofa að múra aðeins fyrir hann í vikunni skal ósagt látið. 'Eg kem heim og ákveð að fíra uppí ofninum og skella þessari líka girnilegu Goodfellas pizzu í ofninn. Djöfullinn! Ofnskúffan er skítug! Aðframkominn af heilsubrest myndast ég við það að þvo helv skúffuna og bölva því hvers vegna í ósköpunum ég keypti ekki elhúsvask sem er nógu stór fyrir ofnskúffuna. Jæja, þetta hefst nú allt fyrir rest og pizzan smakkast ágætlega, þessi eina sneið sem ég næ að nauðga ofan í mig. 'Eg þarf að taka á öllu sem ég á að fara ekki á spjallið á facebook og reyna að ná mér í konu svo ég þurfi aldrei að vera einn og yfirgefinn framar með hálsbólgu, hita og kvef, eins og eitt af þessu væri ekki nóg. Það er sennilega afar vanhugsað að fara á spjallið og finna sér konu í þessu hræðilega ástandi. Sumir lesendur myndu kannski vilja snúa þessum texta upp á haus og láta sér detta í hug að höfundur sé að fiska eftir vorkunn. Það er af og frá. Mér líður bara illa, er lítill og lasinn og vildi láta sem flesta vita af því, það er allt annar hlutur ;)