Skylduskrif dagsins

Fékk sms áðan frá kunningja: ekkert nýtt blogg? Maður getur nú ekki brugðist dyggum lesendum. Hef nú ekki trú á að þessi færsla eigi eftir að fjölga lesendum, en ég lofaði. Fór í viðtal í morgun hjá lækninum mínum. Það var uppbyggilegt og gott, en þar sá ég að óþolinmæði mín stendur mér fyrir þrifum á leið minni til bata. Henni fannst ég í mun betra jafnvægi en á síðasta fundi, en mér fannst ekkert hafa breyst. Vorum þó sammála um að svefninn þyrfti að laga. 'I dag hefur mér liðið eins og geltum fola: Það bara vantar eitthvað! Það er skrítið að geta ekki dempað niður hugsanir sínar með góðu móti. Hugurinn er á fullu útí eitt en hver einasti vöðvi líkamans öskrar á svefn eins og offitusjúklingur á vínarbrauðslengju. Nú ætla ég að fá mér te, setjast í jógastellingu á gólfið og stilla á gufuna, hlýtur að virka. Annars var ég með líffræðikennara í Fsu sem hét Örn, honum tókst alltaf að svæfa mig, ætli hann sé til á teipi?

Athugasemdir

[Gunna (IP-tala skráð) 8.5.2012 kl. 08:36]

Ég luma á nokkrum svakalega svæfandi lífeðlisfræðitímum á upptökum, þær klikka ekki;)

[KSvava (IP-tala skráð) 8.5.2012 kl. 09:51]

Bwhahaha þú ert snillingur frændi :D

[Siggi (IP-tala skráð) 8.5.2012 kl. 14:25]

Ef ég man rétt þá vorum við í myllu mest af tímunum hans Arnar, en svæfandi var hann samt

[Sigurður Magnús Sólmundsson, 9.5.2012 kl. 11:03]

já það var myllan sem hélt manni vakandi hluta af tímanum Siggi:)